ວັດອົງຕື້ມະຫາວິຫາຣ


ວັດອົງຕື້ມະຫາວິຫານ ເປັນ1ໃນຈຳນວນຫລາຍໆວັດທີ່ເກົ່າແກ່ທີ່ສຸດ, ໃນນະຄອນຫລວງວຽງຈັນ,ແລະມີຄວາມຫມາຍຄວາມສຳຄັນທາງໂບລານນະສະຖານ ແລະ ປະຫວັດສາດ ເປັນວັດທີ່ ປະຊາຊົນລາວ ທີ່ຢູ່ປະເທດອ້ອມຂ້າງ ກໍຄື ປະຊາຊາຊົນຢູ່ປະເທດອື່ນໆ ໃຫ້ຄວາມເຄົາລົບນັບຖື ແລະໃຫ້ຄວາມສຳຄັນເປັນພິເສດ ເຊິ່ງສະແດງອອກຈາກຄຳເວົ້າທີ່ວ່າ ບຸກຄົນ ຜູ້ໃດເຂົ້າມາໃນວຽງຈັນ ຄັນບໍ່ໃດ້ໄປກາບນົບຍາພໍ່ອົງຕື້ ຖືວ່າມາບໍ່ຮອດວຽງຈັນ
ນອກຈາກນີ້ ວັດອົງຕື້ຍັງເປັນສະຖານທີ່ປະກອບພິທີສຳຄັນໆ ທາງລາດສະການໃນສະໃຫມກ່ອນ ເຊັ່ນພິທີ ຖືນ້ຳ ຫລື ດື່ມນ້ຳສັດຕາບັນ (ກິນນ້ຳສາບານ) ຂອງບັນດາຜູ້ນຳປະເທດໃນສະໃຫມກ່ອນຈະເປັນ ປະເທດ ສາທາລະນະລັດປະຊາທິປະໄຕ ປະຊາຊົນລາວ,
ໃນຂະນະທີ່ ງານປະເພນີບຸນທາດຫລວງສຳເລັດລົງແລ້ວ ແຕ່ຖືວ່າຍັງບໍ່ແລ້ວ ເພາະຕ້ອງໃດ້ມາປະກອບພິທີ ເຮັດບຸນຢູ່ວັດອົງຕື້ ວັດອິນແປງອີກ ຈື່ງຈະຖືວ່າງານປະເພນີບຸນພະທາດຫລວງສຳເລັດລົງຢ່າງສົມບູນໃນສະໃຫມກ່ອນ ວັດອົງຕື້ມີອານາເຂດຕິດກັບວັດອິນແປງ, ວັດມີໄຊ ແລະ ວັດຫາຍໂສກ, ແຕ່ຍ້ອນການພັດທະນາຂອງບ້ານເມືອງມີການຂະຫຍາຍ, ມີການຕັດຖະຫນົນຫົນທາງ ເພື່ອຄວາມສວຍງາມ ແລະການເປັນລະບຽບຮຽບຮ້ອຍ ດັ່ງນັ້ນຈື່ງເຮັດໃຫ້ວັດທັ້ງ4ຄື ວັດອົງຕື້ , ວັດອິນແປງ ວັດມີໄຊ ແລະ ວັດຫາຍໂສກ ຕ້ອງແຍກອອກຈາກກັນດັ່ງທີ່ເຮົາເຫັນໃນປະຈຸບັນ 
ປະຈຸບັນວັດອົງຕື້ ມີພະອຸໂບສົດໃຫຍ່ຢູ່ 1ຫລັງ ກ້ວງ 16ແມດ,34ເຊັນຕີແມດ ຍາວ 40ແມັດ ແລະ ສູງປະມານ 25ແມັດ ມີພະເຈົ້າໃຫຍ່ອົງຕື້ເປັນພະປະທານ ຫນ້ຕັກກວ້າງ 3ແມັດ40ເຊັນຕີແມັດ ສູງ5ແມັດ80ເຊັນຕີແມັດ ຫລຊ່ຂື້ນໂດຍ ພຣະເຈົ້າໄຊຍເສດຖາທິລາດ ເມື່ອປີ ພ.ສ 2109  ພ້ອມດ້ວຍ ພະສຸກ ພະໃສ ແລະ ພະເສີມ 

                                                
                                            ພຣະເຈົ້າອົງຕື້ປະຈຸບັນ





ແຕ່ກ່ອນວັດອົງຕື້ ມີຊື່ວ່າ ວັດສີພູມ ຫລື ໄຊຍະພູມ ເຊິ່ງວັດສີພູມ ຫລື ໄຊຍະພູມນີ້ ໃຜເປັນຜູ້ສ້າງ ແລະມີປະຫວັດຄວາມເປັນມາຄືແນວໃດນັ້ນ ບໍ່ໃດ້ມີການບັນທືກໄວ້ ຕໍ່ມາຮອດປີ 2109 ພະເຈົ້າໄຊຍະເສດຖາທິລາດໃດ້ມາສ້າງພະເຈົ້າອົງຕື້ຂື້ນ ແລະນຳມາປະດິດສະຖານໄວ້ໃນວັດສີພູມແຫ່ງນີ້ ຈື່ງໃດ້ຕັ້ງຊື່ວັດໃຫມ່ວ່າ ວັດອົງຕື້ຕາມຊື່ຂອງພະພຸດທະຮູບໃຫຍ່ ຫລື ພຣະປະທານໃນພະອຸໂບສົດ ຄຳວ່າຕື້ ອາດມາຈາກ

ມາດຕາວັດແທກນ້ຳຫນັກ 

12 ກິໂລ ເອີ້ນ 1 ຫມື່ນ
120 ກິໂລ ເອີ້ນ 1 ແສນ
1200 ກິໂລ ເອີ້ນ 1 ລ້ານ
12000 ກິໂລ ເອີ້ນ 1 ຕື້



        ພຣະເຈົ້າໄຊຍະເສດຖາທິລາດ ພຣະມະກະສັດລາວ ພຣະອົງມີສັດທາຢ່າງແຮງກ້າ ປາດຖະຫນາຢາກເປັນພຣະພຸດທະເຈົ້າ ຈື່ງໃດ້ຕັ້ງຄວາມພຽນ ແລະການເສຍສະຫລະຢ່າງສູງ ທີ່ຈະສ້າງພຣະພຸດທະຮູບທອງຫລໍ່ ໃຫ້ໃຫຍ່ທີ່ສຸດ(ໃນສະໃຫມນັ້ນປີ2009) ໃດ້ມີການກຽມພ້ອມທຸກຢ່າງເປັນທີ່ຮຽບຮ້ອຍທຸກປະການ , ເມື່ອເຖິງເວລາອັນເປັນມະຫາເລີກ ມະຫາໄຊ ຕາມພິທີຂອງໂຫລາຈານ ພຣະເຈົ້າໄຊຍະເສດຖາທິລາດກໍຊົງໃດ້ມອບ ພຣະຮາດສະກໍລະນີຍະກິດທຸກຢ່າງ ໄວ້ກັບພຣະມະເຫສີ, ແລະພຣະອົງຊົງ ນຸ່ງຂາວ ຮົ່ມຂາວ ໄປສະມາທານສິນ8 ຢູ່ໃນວັງພິທີ ທີ່ວັດອິນແປງ, ແຕ່ກ່ອນເຖິງເວລາມະຫາເລີກມະຫາໄຊນັ້ນ ກອງທັບຂອງພຣະມະຫາກະສັດ ປະເທດພຣະມ້າ ໃດ້ຍົກມາຮອດປະຕູເມືອງວຽງຈັນແລ້ວ ແລະໃດ້ເຮັດສານ(ຫນັງສື)ແຈ້ງຄຳຂາດ ໃຫ້ແມ່ທັບທັ້ງ4ຖືເຂົ້າມາຍື່ນໃຫ້ພຣະເຈົ້າໄຊຍະເສດຖາ ຢູ່ໃນວັງພິທີຫລໍ່ ນັ້ນ ມີເນື້ອໃນໃຈຄວາມຢູ່2ຂໍ້ວ່າ:


1.ໃຫ້ພຣະເຈົ້າໄຊຍະເສດຖາຍອມເປັນເມືອງຂື້ນຂອງພຣະມ້າ
2.ຖ້າບໍ່ຍອມໃຫ້ພຣະເຈົ້າໄຊຍະເສດຖາ ອອກມາສູ້ຮົບກັນແລະໃຫ້ຕອບຄຳຖາມກັບຜູ້ຖືຫນັງສືມານັ້ນເລີຍ ບໍ່ໃຫ້ຊັກຊ້າເສຍເວລາ,

ຫລັງຈາກແມ່ທັບທັ້ງຍື່ນຫນັງສືໃຫ້ພຣະເຈົ້າໄຊຍະເສດຖາທິລາດກໍ່ໃດ້ຢ່າງໄປເບິ່ງຊ່າງທີ່ສູບເຕົາຫລອມທອງທີ່ກຳລັງຮ້ອນແດງຢູ່ນັ້ນ ແມ່ທັບພຣະມ້າທີ່ມີລິດເດດ ມີພຣະຄາຖາອາຄົມກໍໃດ້ສະແດງອິດທິລິດ ໂດຍການເອົາມືໄປຈັບເບົ້າຫລອມພຣະ ທີ່ກຳລັງແດງໆຢູ່ນັ້ນ ໂດຍບໍ່ມີອາການຮ້ອນເລີຍ , ເມື່ອພຣະເຈົ້າໄຊຍະເສດຖາທິລາດທອດພຣະເນດເຫັນດັ່ງນັ້ນຈື່ງຕົກພຣະໄທ ແລະ ເດີນທາງເຂົ້າໄປໃນພຣະຣາຊວັງຢ່າງຟ້າວຝັ່ງ,ພຣະມະເຫສີ ເຫັນຄວາມຜິດປົກກະຕິຂອງພຣະອົງກໍຊົງຖາມວ່າ ຍັງບໍ່ຮອດເວລາເຮັດພິທີ ເທທອງຫລໍ່ພຣະເປັນຫຍັງພຣະອົງຈື່ງສະເດັດກັບມາ "ພຣະອົງຈື່ງເລົ່າເຫດການທີ່ ແມ່ທັບພຣະມ້າມີຄວາມປະສົງ         ແລະສະແດງອະພິນິຫານໃຫ້ພຣະອົງຊົງທອດພຣະເນດ,
ພຣະມະເຫສີ ຈື່ງເວົ້າໃຫ້ສະຕິພຣະອົງວ່າ :ພຣະອົງບໍ່ຕ້ອງຕົກພຣະໄທ ທີ່ພຣະອົງ ມີພຣະປະສົງຢາກສ້າງພຣະໃຫຍ່ເທື່ອນີ້,ເພື່ອປາດຖະຫນາ ສິໃດ້ເປັນພຣະພຸດທະເຈົ້າໃນມື້ຫນ້າສືບໄປ ຖ້າຄຳປາດຖະຫນາຂອງພຣະອົງນີ້ບໍ່ສຳເລັດຜົນ ແລະສິພ່າຍແພ້ເສີກພະມ້າເທື່ອນີ້ ກໍ່ຂໍໃຫ້ມືຂອງພຣະອົງ ກຸດ (ຂາດ) ໄປກັບເບົ້າຫລໍ່ພຣະນັ້ນໂລດ , ແຕ່ຖ້າຄວາມປາດຖະຫນາຂອງພຣະອົງຈະສຳເລັດ ແລະໃດ້ຮັບໄຊຊະນະຈາກພຣະມ້ານັ້ນ ຂໍໃຫ້ເບົ້າທອງທີ່ຊິຫລໍ່ພຣະ ມີອາການເຍັນ ແລະບໍ່ຫນັກ ໃຫ້ມີອາການເປັນຄື ເວລາຈັບຫມວກໃສ່ຫົວ. ເມື່ອພຣະອົງໃດ້ສະຕິຈາກ ພຣະມະເຫສີ ພຣະອົງເຂົ້າໄປໃນຫ້ອງໃຫວ້ພຣະ ກ່າວ ສັກກາລະເທວະດາ ຕັ້ງສັດຍາ ອາທິຖານ ຢ່າງຫນັກແຫນ້ນ ແລ້ວກັບສູ່ວັງພິທີຫລໍ່ (ວັດອິນແປງ)ເມື່ອພຣະອົງຊົງສະເດັດກັບມາສູ່ວັງພິທີຫລໍ່ພຣະນັ້ນ ຈື່ງໃດ້ໃຫ້ຄຳຕອບແກ່ແມ່ທັບພຣະມ້າ ທັ້ງ4ຄົນວ່າ ຄຳຂາດຂອງແມ່ທັບພຣະມ້າທັ້ງ2 ຂໍ້ນັ້ນເຮົາຍິນດີຮັບຫມົດທຸກຢ່າງ , ແຕ່ວາເວລານີ້ເຮົາກຳລັງເຮັດບຸນ ປາດຖະຫນາເປັນພຣະພຸດທະເຈົ້າ, ຂໍເຊິນພວກທ່ານມາທຳບຸນຮ່ວມກັນກ່ອນ, ແລ້ວຈື່ງ ປະຕິບັດຕາມຄຳຂາດນັ້ນພາຍຫລັງ. ພໍດີໃດ້ພິທີອັນເປັນມະຫາເລີກມະຫາໄຊ ວ່າແລ້ວພຣະອົງກໍ່ໃດ້ສະເດັດໄປຫໍທີ່ເທທອງໃສ່ເບົ້າຫລອມ, ແລະພຣະອົງຈັບ ພຣະຂັນ(ດາບທີ່ມີ2ຄົມ) ດ້ວຍມືເບື້ອງຊ້າຍ ເບື້ອງຂວາ ຮັບເອົາເບົ້າຕົ້ມທອງ ທີ່ກຳລັງແດງ ແລະ ຮ້ອນ ທີ່ຊ່າງຍື່ນໃຫ້ພຣະອົງ,ພຣະອົງບໍ່ໃດ້ມີຄວາມຮູ້ສືກຮ້ອນເລຍ ຈົນທອງຫມົດ, ເມື່ອຈົບພິທີນັ້ນແລ້ວ ແມ່ທັບພະມ້າທັ້ງ4ທີ່ໃດ້ເຂົ້າຮ່ວມພິທີເທທອງຫລໍ່ພຣະຢູ່ນັ້ນກໍ່ໃດ້ເດີນທາງກັບພ້ອມຖືຫນັງສື ຄຳຕອບຂອງພຣະເຈົ້າໄຊຍະເສດຖາທິລາດໄປພ້ອມ. ເວລາທີ່ແມ່ທັບພຣະມ້າທັ້ງ4 ເຂົ້າເຝົ້າພຣະມະຫາກະສັດຂອງຕົນນັ້ນກໍ່ໃດ້ເລົ່າ ເຫດການທຸກຢ່າງໃຫ້ຟັງຕາມຄວາມເປັນຈິງ, ແລ້ວກໍ່ພາກັນພັກຜ່ອນ, ຫລັບນອນຕາມເວລາອັນສົມຄວນ, ແລະໃນຄືນມື້ນັ້ນ ພຣະອົງໃດ້ລັກໄປຫາພຣະມະຫາກະສັດຂອງພະມ້າ , ແຕ່ວ່າກ່ອນການເດີນທາງໃນຄຳຄືນມື້ນັ້ນ ພຣະອົງໃດ້ກ່າວສັກກາລະບູຊາເທວະດາ ແລະຕັ້ງສັດຈະອະທິຖານວ່າ “ 1.ຖ້າວ່າຂ້າພຣະເຈົ້າສິໃດ້ເປັນພຣະພຸດທະເຈົ້າ 2. ຖ້າຂ້າພຣະເຈົ້າສິໃດ້ຮັບໄຊຊະນະໃນການສູ້ຮົບ ກັບກອງທັບພະມ້າໃນເທື່ອນີ້ແລ້ວ, ຂໍໃຫ້ເທບພຣະເຈົ້າ ພວງໄພເທພາອາລັກ ຈົ່ງຊ່ວຍເປັນສັກຂີພະຍານບັນດານ ໃຫ້ກອງທັບພະມ້າ ພ້ອມທັ້ງຊ້າງມ້າ ຈົ່ງພາກັນຫລັບໃຫລ ໃນເວລາທີ່ຂ້າພຣະເຈົ້າໄປຍາມ(ໄປຫາ) ກະຢ່າໃຫ້ຮູ້ເມື່ອຄີງ ເມື່ອພຣະອົງຕັ້ງພະໄທຢ່າງຫນັກແຫນ້ນດັ່ງນັ້ນແລ້ວ ກະໃດ້ອອກເດີນທາງ ແລະ ມີທະຫານທີສະນິດຕິດຕາມໄປພຽງແຕ່ຄົນດຽວ, ເມື່ອເວລາໄປຮອດຄ້າຍຂອງກອງທັບພະມ້າ ປາກົດວ່າ ຄົນແລະສັດ ພາກັນນອນຫລັບຫມົດ ບໍ່ມີໃຜຮູ້ເມື່ອຄີງເລີຍ ເມື່ອພຣະເຈົ້າໄຊຍະເສດຖາທິລາດເຫັນດັ່ງນັ້ນແລ້ວຈື່ງມີຕວາມຫມັ້ນໃຈໃນຄຳອາທິຖາຂອງຕົນ ທຳອິດພຣະອົງ ດືງດາບອອກມາສິຕັກຄໍ ພຣະມະຫາກະສັດ ແລະ ແມ່ທັບ ຂອງພະມ້າ ທີ່ກຳລັງນອນຫລັບໃຫລຢູ່ນັ້ນ ແລ້ວພຣະອົງກະຄິດໃດ້ວ່າ ໂຕເອງບຳເພັນພຽນ ປາດຖະຫນາ ພຸດທະພູມ ແລ້ວຕົນເອງສິມາເຮັດບາບຂ້າຄົນຄືແນວນີ້, ບໍ່ໃດ້ເດັດຂາດ , ແລ້ວພຣະອົງກະໃດ້ປືກສາກັບທະຫານຄົນສະນິດທີ່ຕິດຕາມໄປໃນເວລານັ້ນ ວ່າ: ສິເຮັດແນວໃດໃຫ້ເຂົາຮູ້ວ່າເຮົາມາຫາ?ທະຫານຄົນນັ້ນແນມເຫັນກ່ອງປູນ ສະໃຫມກ່ອນນິຍົມຄ້ຽວຫມາກ ທີ່ວາງຢູ່ທາງຂ້າງ , ກໍ່ໃດ້ແນະນຳໃຫ້ພຣະອົງ ໄຊ້ປູນຜະສົມນ້ຳແລ້ວເອົາໄປທາໃສ່ຄໍຂອງພຣະມະຫາກະສັດພະມ້າ , ແລະແມ່ທັບທັ້ງ4 ເປັນຮູບກາກະບາກ ໂຕ X ຫລັງຈາກນັ້ນກໍ່ໃດ້ເດີນທາງກັບ ພຣະຮາຊວັງ ພໍພຣະມະຫາກະສັດຂອງພະມ້າຕື່ນຂື້ນມາພ້ອມທັ້ງແມ່ທັບທັ້ງ4 ຕ່າງຝ່າຍກະເຫັນປູນທາຢູ່ຄໍຂອງຕົນເອງ ແລະທຸກຄົນກະໃດ້ປະຕິເສດວ່າ ບໍ່ໃດ້ເຮັດ, ຈື່ງພາກັນສັນນິຖານວ່າ ຕ້ອງເປັນພຣະເຈົ້າໄຊຍະເສດຖາແນ່ນອນ , ຈື່ງໃດ້ມີການປືກສາຫາລື ເລື້ອງການເຮັດເສີກກັບພຣະເຈົ້າໄຊຍະເສດຖາ ຖ້າວ່າຕ້ອງເຮັດເສິກ ຕ້ອງປະລາໄຊ ແນ່ນອນ

ຈື່ງປ່ຽນແນວຄິດຈາກສັດຕູມາຂໍເປັນມິດ ໃນເວລາທີ່ແມ່ທັບຂອງພະມ້າແລະແມ່ທັບທັ້ງ4ໃດ້ປືກສາຫາລືກັນຢູ່ນັ້ນ ທະຫານຮັບໄຊ້ຂອງພຣະເຈົ້າໄຊຍະເສດຖາກະໃດ້ເຂົ້າມາບອກວ່າ ມື້ຄືນນີ້ພຣະອົງມາຫາພວກທ່ານມາຫາພວກທ່ານ ແຕ່ເຫັນວ່າພວກທ່ານກຳລັງຫລັບ ຄັນສິປຸກ ກະສິເປັນການລົບກວນ ເລີຍເດີນທາງກັບໄປ ບັດນີ້ຕື່ນຂື້ນມາແລ້ວຂໍຖືເປັນກຽດຮຽນເຊີນ ພຣະອົງທ່ານໄປສູ່ພຣະຮາວັງຂອງລາວເຮົາເພື່ອປືກສາວຽກບ້ານການເມືອງ ເມື່ອພຣະມະຫາກະສັດພະມ້າໃດ້ຍິນດັ່ງນັ້ນກະຮູ້ສືກດີໃຈຈື່ງໃດ້ກຽມເຄື່ອງບັນນາການ(ຂອງຂວັນ)ຈຳນວນ1, ພ້ອມແມ່ທັບທັ້ງ4ເດີນທາງເຂົ້າໄປພົບ ພຣະເຈົ້າໄຊຍະເສດຖາທິລາດ ເວລາລາມາເຖິງກະໃດ້ຮັບການຕ້ອນຮັບຢ່າງສົມພຣະກຽດ ຕາມປະເພນີ ຣາຊາ ທັ້ງ2ພຣະອົງກໍ່ໃດ້ໃຫ້ຄຳຫມັ້ນສັນຍາ ວ່າສິມີຄວາມຊື່ສັດຕໍ່ກັນ , ຖ້າຝ່າຍໃດຝ່າຍ1 ຫາກຂາດເຂີນສິ່ງໃດ ໃຫ້ຮ້ອງຂໍຕໍ່ກັນ ແລະຊ່ວຍກັນຈົນເຕັມຄວາມສາມາດ ການໂອ້ລົມເຈລະຈາກັນເທື່ອນັ້ນ ສຳເລັດລົງດ້ວຍການ ກິນນ້ຳສາບານ(ນ້ຳສັດຍຕະຍາບັນ) .

ຫລັງຈາກນັ້ນພຣະມະຫາກະສັດຂອງພະມ້າຈື່ງໃດ້ຂໍຮຽນວິຊາ ທາປູນໃສ່ຄໍ ນຳພຣະອົງ, ພຣະອົງຈື່ງໃດ້ເວົ້າໃຫ້ຟັງວ່າທາປູນໃສ່ຄໍບໍ່ແມ່ນວິຊາອາຄົນອີ່ຫຍັງ ຕັ້ງແຕ່ໄດ້ຮັບຄຳທ້າຈາກແມ່ທັບທັ້ງ4ແລ້ວ, ຕົນໃດ້ຮັບຄຳເຕືອນສະຕິຈາກພະມະເຫສີ ພຽງແຕ່ເອົາປູນໄປທາໄວ້ຄໍຂອງພຣະອົງ ແລະແມ່ທັບທັ້ງ4ທໍ່ນັ້ນ ດ້ວຍສຳນືກບຸນຄູນຂອງພຣະມະເຫສີ ພຣະມະຫາກະສັດຂອງພຣະມ້າ ຈື່ງຂໍອານຸຍາດ ຄວັດ(ແກະສະຫລັກ) ຮູບ ພຣະອັກຄະມະເຫສີ ທໍ່ກັບອົງແທ້ຂອງພຣະອົງດ້ວຍ ຫິນ, ໄວ້ເປັນ ອານຸສອນ ແລະ ພະເຈົ້າໄຊຍະເສດຖາທິລາດກະໃດ້ຂໍ ແກະ ສະຫລັກ ພຣະອັກຄະມະເຫສີ ຂອງພະມ້າຂື້ນອີກອົງ1ໄວ້ເປັນຄູ່ກັນ, ເພາະເປັນສັນຍາສຳຄັນຂອງສຳພັນໄມຕີ ເປັນຄັ້ງປະຫວັດສາດ , ພວກຊ່າງກະໃດ້ແກະສະຫລັກຮູບ ພຣະອັກຄະມະເຫສີທັ້ງ2 ດ້ວຍແຜ່ນຫິນ ແລະປະດິດສະຖານໄວ້ຢູ່ວັດອິນແປງຈົນຮອດທຸກມື້ນີ້
ຕາມປະຫວັດສາດໃດ້ບັນທືກຫານຮຸກຮານຂອງພວກສັກດີນາດັ່ງນີ້

ເທື່ອທຳອິດ ປີ ພ.ສ2127 ໃນລັດສະການຂອງ ພຣະສຸຣິນທະລືໄຊ(ຈັນ) ສັກດີນາພະມ້າໃດ້ເຂົ້າມາຕີວຽງຈັນໃດ້ສຳເລັດ ພ້ອມທັ້ງຈູດເຜົາ,ທຳລາຍວັດວາອາລາມ,ວັດຖຸມີຄ່າ ມູນເຊື້ອວັດທະນະທຳ ເຊິ່ງລວມໄປຮອດວັດອົງຕື້ແຫ່ງນີ້ນຳ  ເທື່ອທີ 2 ປີ ພ.ສ2322 ຫ່າງຈາກເທື່ອທຳອິດ 195ປີ ໃນລັດສະການຂອງພຣະເຈົ້າ ສິຣິບຸນຍະສານ ສັກດີນາສະຍາມໃດ້ເຂົ້າມາ ຮຸກຮານເທື່ອທີ1, ບຸ້ນຊິງ, ຍືດເອົາວັດຖຸໂບຮານ ສິ່ງຂອງມີຄ່າ ເງິນຄຳກຳແກ້ວຂອງປະຊາຊົນລາວ, ແລະກວດຕ້ອນເອົາປະຊາຊົນ ລາວໄປເປັນຈຳນວນຫລວງຫລາຍເທື່ອທີ 3 ປີ ພ.ສ 2370 ລັດສະການເຈົ້າອານຸວົງ ສັກດີນາສະຍາມ ໃດ້ເຂົ້າມາຮູກຮານ ລາວເປັນເທື່ອທີ2 ປຸ້ນຊິງເອົາວັດຖຸມີຄ່າ ເງິນຄຳກຳແກ້ວ ຊັບສົມບັດ, ທຸກຢ່າງ, ພ້ອມທັ້ງ ຈູດເຜົາ ມ້າງເຮືອນ ວັດວາອາຣາມ, ຫວັງກືນກິນຊາດ ແລະວັດທະນະທຳລາວ ໃຫ້ຫມົດກ້ຽງ ທຸບສິມວັດ ມ້າງໂຮງເຮືອນ ປ/ຊ ເຜົາທຳລາຍ ທຸກຢ່າງ ຈົນວ່າບ້ານເຮືອນແດງເປັນໄຟໃນເວລາຄ່ຳມືດ ຮ້າຍແຮງທີ່ສຸດ ແມ່ນ ວັດອົງຕື້ ຖືກຮື້ຖອນແລະມ້າງເຮືອນປະຊາຊົນ ມາກວມສິມວັດ ຫວັງຫລອມ ພຣະອົງໃຫ້ເສື່ອມສະຫລາຍ ໄປກັບກອງໄຟ ແຕ່ເກີດປະຕິຫານ ກອງໄຟອັນໃຫຍ່ຫລວງທີລຸກໃຫມ້ ຄວາມຮ້ອນທີ່ສຸມຈາກກອງຟືນທີ່ມ້າງມາຈາກເຮືອນປະຊາຊົນ 3ຫລັງຄາເຮືອນ ກອງພືນສູງ 30ແມັດ ,ບໍ່ສາມາດ ຫລອມພຣະອົງຕື້ ໃຫ້ລະລາຍ ຫລື ບໍ່ເຮັດໃຫ້ພຣະອົງຕື້ເສຍຫາຍເລີຍ ແມ້ແຕ່ຫນ້ອຍດຽວ  ປ່ຽນໃດ້ແຕ່ສີ ບາຣະມີຍັງຢູ່
ເທືອທີ່ 4 ປີ ພ.ສ 2416 ໂຈນຫໍ້ ໃດ້ເຂົ້າມາປຸ້ນສະດົມ ຂຸດຄົ້ນເອົາວັດຖຸມີຄ່າ 

ຈາກບົດຂຽນຂອງ ພຣະອາຈານຜ່ອງ ສະມາເລິກ ເຈົ້າອາທິການ ວັດອົງຕື້ 

ຫມາຍເຫດ (ມີການເພີ່ມເຕິມບາງຂໍ້ມູນເພື່ອໃຫ້ເຂົ້າໃຈງ່າຍຂື້ນ) 
               ຄຳໃຫວ້ ພຣະເຈົ້າໃຫຍ່ອົງຕື້            ວ່ານະໂມ ສາມເທື່ອ
ສາທຸ ສາທຸ ພຸດທະພິມພິເກ ເສວັດໂຕ
ສາທຸ ສາທຸ ພຸດທະພິມພິເກ ເສວັດໂຕ ວັດຕິ ວັດຕະໂສພິໂຕ
ຄຸນນະສັມປັນໂນ ໂຄຕະມັງ ພຸດທະເຊດຖັງ ເທວະມະນຸດສາໂລກັງ ປູຊິງຕັງໄຊຍະເຊດຖັງ ຖາປິດຕັງ ເຂລັງ ສີລະສານະມາມິ ອະທັງວັນທາມິ ທູຮະໂຕອະຫັງວັນທາມິ ທາຕຸໂຍ ອະຫັງວັນທາມິ ສັບພະໂສ ອະຫັງວັນທາມິ ສັບພະທາ ສາທຸ ສາທຸ ສາທຸ ອະນຸໂມທາມິ . (ວ່າສາມເທື່ອ )
ຈາກບົດຂຽນຂອງ ພຣະອາຈານຝ່ອງ ສະມາເລິກ ເຈົ້າອະທິການ ວັດອົງຕື້ 

Comments

Popular posts from this blog

ຄວາມເປັນມາຂອງວັນບຸນອອກພັນສາ

ວັນມາຄະບູຊາ

ບຸນເຂົ້າພັນສາ