ສະບາຍ​ດີ​ປີ​ໃຫມ່​ລາວ ພສ 2560


ສະບາຍ​ດີ​ປີ​ໃຫມ່​ລາວ ພສ 2560
       ປີໃໝ່ຫຼື  ບຸນກຸດສົງການແມ່ນປະເພນີໜຶ່ງ ທີ່ຢູ່ໃນຮີດສິບສອງຂອງລາວ ຈະເລີມໃນລະຫວ່າງມື້ ຂື້ນ 15 ຄ່ຳເດືອນຫ້າ -15 ຄ່ຳເດືອນຫົກລາວແຕ່ໃນປະຈຸບັນກຳໜົດເອົາລະຫວ່າງວັນທີ່ 13-15 ​​ເດືອນເມສາຂອງທຸກ ໆ ປີ ຈິ່ງເອີ້ວ່າບຸນເດືອນຫ້າ ບຸນສົງນ້ຳ ບຸນກຸດສົງການກໍ່ວ່າ ຄຳວ່າກຸດສົງກາແປວ່າການຍ້າຍເຄື່ອນທີ່ ຄືວັນທີ່ພຣະອາທິດເຄື່ອນຈາກຣາສີໜື່ງໄປສູ່ຣາສີໜຶ່ງເປັນປີໃຫມ່
ມູນ​ເຫດ​ແຫ່ງ​ການ​ທຳ
        ​ເທດສະການ​ສົງການ ​ແມ່ນ​ເທດ​ສະການ ຫຼື​ປາງ​ບຸນ​ໜຶ່ງ​ທີ່​ຍິ່ງ​ໃຫຍ່​ຂອງ​ລາວ ​ເພື່ອ​ຄວາມ​ສາມັກຄີ ຄວາມ​ມ່ວນ​ຊື່ນ​ລື່ນ​ເລີງ​ໃນ​​ໄລຍະ​ເວລາ​ຫວ້າງ​ຈາກ​ວຽກ ​ແລະ​ກະກຽມ​ສູ່​ການ​ເລີ່​ມຕົ້ນ​ການ​ຜະຫຼິດ​ໃນ​ລະດູ​ໃໝ່ ​ແລະ​ເພື່ອ​ຄວາມ​ເປັນ​ສີ​ລິ​ມຸງຄຸນ​ໃຫ້​ແກ່​ກັນ​ແລະ​ກັນ ​ໂດຍ​ໃຊ້​ນ້ຳ​ເປັນ​ສື່​ກາງ ສະ​ແດງ​ເຖິງ​ຄວາມ​ຊຸ່ມ​ເຢັນ ຄວາມ​ເປັນ​ມິດຕະພາບ ​ແລະ​ການ​ຊຳລະ​ສະ​ສາງ ສິ່ງ​ບໍ່​ດີ​ບໍ່​ງາມ​ອອກ​ຈາກ​ກາຍ ​ແລະ​ໃຈ
ມີ​ຕຳນານ​ເລົ່າ​ວ່າ ​ໃນ​ປະຖົມ​ພັດທະ​ກັບນີ້ ມີ​ເສດຖີ​ຄົນ​ໜຶ່ງ​ບໍ່​ມີ​ບຸດ​ສືບ​ຕະກຸນ ມື້ໜຶ່ງ​ມີ​ນັກ​ເລັງ​ສຸລາ​ມາ​ເຮື​ອນຂອງ​ເສດຖີ ​ແລ້ວ​ສະ​ແດງ​ອາການ​ໄຫ້ ແລະຫົວຂວັນ ​ ​ຕໍ່ໜ້າ​ເສດຖີ ​ເມື່ອ​ເສດ​ຖີ​ເຫັນ​ເປັນ​ດັ່ງ​ນັ້ນ​ຈິ່ງ​ຖາມ​ວ່າ ​ເປັນ​ຫຍັງ​ເຈົ້າ​ຄື​ສະ​ແດງ​ອາການ​ແບບ​ນີ້ ຊາຍ​ຂີ້​ເຫຼົ້າ​ຈິ່ງ​ຕອບ​ວ່າ ທີ່​ຂ້ານ້ອຍ​ໄຫ້ ​ເພາະວ່າ​ດີ​ຕົນ​ທ່ານ​ເສດຖີ ທີ່​ມີ​ເຂົ້າຂອງ​ລ້ຳ​ລວຍ​ແຕ່​ບໍ່​ມີ​ລູກ​ສືບ​ຕະກູນ ສ່ວນ​ຂ້ານ້ອຍ​ນີ້​ຍາກຈົນ ​ແຕ່​ກໍ່​ມີ​ລູກ​ໄວ້​ສືບ​ຕະກຸນ ຂ້ານ້ອຍ​ຈິ່ງ​ຫົວ ຈາກ​ນັ້ນ​ຊາຍ​ຂີ້​ເຫຼົ້າ​ກໍ່​ແນະນຳ​ໃຫ້​ເສດຖີ ​ໄປ​ບວງສວງ​ເທວະ​ດາ​ຢູ່​ຕົ້ນ​ໄຮ​ໃຫຍ່ ​ເພື່ອ​ຂໍລູກ ​ເສດຖີ​ກໍ່​ກະທຳ​ຕາມ ​ລຸກຂະເທວະ​ດາ​ຮັກສາ​ຢູ່​ສະຖານ​ທີ່​ນັ້ນ ມີ​ຄວາມ​ກະຣຸນາ​ຈິ່ງ ​ໄປ​ເຝົ້າ​ພະ​ອິນ​ຂໍ​ໃຫ້ ທັມມະ​ບານ​ເທວະ​ບຸດ​ລົງມາ​ເກິ​ດ ​ເມື່ອ​ພັນ​ລະ​ຍາ​ເສດຖີ​ປະສູດ​ລູກ​ອອກ​ມາ​ແລ້​ວ ຈິ່ງ​ໃສ່​ຊື່ວ່າ ທັມມະ​ບານ​ກຸມມານ ​ເມື່ອ​ທັມມະ​ບານ​ກຸມມານ​ໃຫຍ່​ກ້າ​ໜ້າບານ​ຂື້ນ​ມາ​ແລ້ວ​ ປາກົດ​ວ່າ​ເປັນ​ຄົນ​ທີ່​ມີ​ສະຕິ​ປັນຍາ​ສາມາດ​ຮຽນ​ຈົບ​ໄຕຣ​ເພດ ​ແລະ​ຕອບ​ບັນຫາ​ໄດ້​ທຸກ​ຢ່າງ ສາມາດ​ຮູ້​ພາສາ​ສັດ​ນ້ອຍ​ໃຫຍ່​ທັງ​ໝົດ ​ເປັນ​ທີ່​ເພິ່ງ​ຂອງ​ຄົນ​ທັງຫຼາຍ ​ເມື່ອ​ຊື່​ສຽງ​ທັມມະ​ບານ​ກຸມມານ ລືຊາ​ຜາກົດ​ໄປ​ທົ່ວ​ຊຸມພູ​ທະວີບ​ ກໍ່​ຮ້ອນ​ໄປ​ເຖິງ​ກະບິນລະ​ພົມ ຈິ່ງ​ແປງ​ເພດ​ລົມາ​ຖາມ​ບັນ​ຫາ​ກັບ​ທັມມະ​ບານ​ກຸມມານ ​ແລະ​ສັນຍາ​ກັນ​ວ່າ​ຖ້າ​ທັມມະ​ບານ​ກຸມມານ​ຕອບ​ປັນຫາ​ໄດ້ ຈະ​ຍອມ​ໃຫ້​ທັມມະ​ບານ​ກຸມມານ​ຕັດ​ຫົວ​ຂອງ​ຕົນ ​ແຕ່​ຖ້າ​ຕອບ​ບໍ່​ໄດ້​ກະບິນລະ​ພົມ​ຈະ​ຕັດ​ຫົວ​ທັມມະ​ບານ​ກຸມມານ​ແທນ ​ປັນຫາ​ທີ່​ກະບິນລະ​ພົມ​ຖາມ​ທັມມະ​ບານ​ກຸມມານ​ມີ​ຢູ່​ສາມ​ຂໍ້ ຄື :
​ໃຫ້​ເວລາ 7 ວັນ​ຖ້າ​ທັມມະ​ບານ​ກຸມມານ​ຕອບ​ບໍ່​ໄດ້​ກໍ່​ຈະ​ທຳ​ຕາມ​ສັນຍາ ທັມມະ​ບານ​ກຸ​ມານ​ຄິດ​ຫາ​ຄຳ​ຕອບ​ບໍ່​ໄດ້​ຈົນ​ຮອດ​ວັນ​ທີ່ ຫ້າ ທີ່​ຫົກ ​ກໍ່​ບໍ​ໄດ້​ຄຳ​ຕອບ ຈິ່ງ​ຕັດສິນ​ໃຈ​ໜີ ອອກ​ຈາກ​ບ້ານ​ບໍ່​ຍອມ​ໃຫ້​ຄົນ​ອື່ນ​ຕັດ​ຫົວ ​ເປັນນິ​ໃສ​ຂອງ​ຄົນ​ຮຽນ​ເກ່ງ ຈະ​ບໍ່​ຍອມ​ຄົນ​ງ່າຍ ໆ ດ້ວຍ​ຄວາມ​ໝົດ​ຫວັງ ​ແລະ​ອິດ​ອ່ອນ​ຈາ​ກການ​ເດີນທາງ ທັມມະ​ບານ​ກຸ​ມມານ ​ໄປ​ນອນ​ພັກ​ຢູ່​ກ້ອງ​ຕົ້ນ​ຕານ ບັງ​ເອີນ​ເທິງ​ຕົ້ນ​ຕາມ​ມີ​ນົກ​ອິນ​ຊີ ສອງຜົວ​ເມຍ ສົນທະ​ນາ​ກັນ​ຕາມ​ພາສາ​ສັດ ຜົວ​ບອກ​ເມຍ​ວ່າ​ມື້​ອື່ນ​ບໍ່​ຕ້ອງ​ໄປ​ຫາ​ກິນ​ເພາະ​ຈະ​ມີ​ຄົນ​ຕັດ​ຄໍ​ກັນ​ເອົາ​ມາ​ຖິ້ມ​ທີ່​ນີ້ ​ເມຍ​ຖາມ​ວ່າ​ເປັນ​ຫຍັງ​ຈິ່ງ​ມີ​ການ​ຕັດ​ຄໍ ?  ຜົວ​ຕອບ​ວ່າ​ກະບິນລະ​ພົມມາ​ຖາມ​ປັນຫາ​ກັບ ທັມມະ​ບານ​ກຸມມານ​ວ່າ   ຕອນ​ເຊົ້າຣາສີ​ຂອງ​ຄົນ​ຢູ່​ໃສ ?
ຕອນສວາຍ ຣາສີ​ຂອງ​ຄົນ​ຢູ່​ໃສ?  ຕອນ​ແລງຣາສີ​ຂອງ​ຕົນ​ຢູ່​ໃສ? ເມຍຖາມອີກວ່າເຈົ້າຮູ້ບໍ່ ຜົວຈິ່ງຕອບວ່າ ຕອນເຊົ້າຣາສີຂອງຄົນຢູ່ໜ້າ ຕື່ນມາຄົນຈຶ່ງເອົານ້ຳລ້າງໜ້າ ຕອນສວາຍ ຣາສີຂອງຄົນຢູ່ເອິກເວລາຮ້ອນຄົນມັກເອົານ້ຳລູບເອິກ ຕອນແລງຣາສີຂອງຄົນຢູ່ຕີນ ກ່ອນນອຄົນມັກລ້າງຕີນ… ​ເມື່ອທັມມະບານກຸມມານໄດ້ຍິນຈິ່ງຟ້າວກັບບ້ານດ້ວຍຄວາມສົມຫວັງ ມື້ທີ່ເຈັດມາຮອດເປັນວັນນັດໝາຍ ກາງສະໜາມຫຼວງ ທັມມະບານກຸມມານ ຕອບບັນຫາຂອງກະບິນລະພົມໄດ້ທຸກຂໍ້ ກະບິນລະພົມຈິ່ງຍອມໃຫ້ທັມະບານກຸມານຕັດຫົວແຕ່ກ່ອນຕັດຫົວ ກະບິນລະພົມໄດ້ເອີ້ນລູກສາວທັງເຈັດມາແລ້ວໃຫ້ເອົາຖາດທອງຄຳມາຮອງຮັບຫົວຂອງພໍ່ໄປໄວ້ເຂົາພະສຸເມນຮອດລະດູຂວບເຂົ້າໃຫ້ຜັດປ່ຽນກັນເອົາມາ​​ແຫ່ອ້ອມເຂົາພະສຸເມນແລ້ວ ຫົດສົງຕາມຮອບປີ ຖ້າບໍ່ເຮັດດັ່ງນັ້ນ ຫົວຂອງພໍ່ຕົກໄປມະຫາສະໝຸດນ້ຳກໍ່ຈະແຫ້ງ ຕົກລົງດິນກໍ່ຈະເກິເປັນໄຟ ຕົກໃສ່ອາກາດກໍ່ຈະເກິແຫ້ງແລ້ງ ລູກສາວຈິ່ງເຮັດຕາມ ຈົນກາຍມາເປັນປະເພນີສົງການ ຫຼືປີໃໝ່ລາວເຮົາທຸກວັນນີ້.
        ຄົນລາວເຮົາຈິ່ງນິຍົມລົດນ້ຳດຳຫົວພໍ່ແມ່ ຄູບາອາຈານແລະຜູ້ນຳຂັ້ນຕ່າງ ໆ ຕະຫຼອດສິ່ງທີ່ຊາວພຸດລວເຄົາລົບສັດທາ​ ​ແລະເປັນທີ່ເພິ່ງສູງສຸດຄືພຣະຣັດຕະນະໄຕ ຈິ່ງມີກາງສົງພຣະແຫ່ພຣະຕົບພະທາດຊາຍ ປ່ອຍສັດແລະສ້າງບຸນກຸສົນດ້ວຍການໃຫ້ທານ ຮັກສາສິນ ຟັງເທດສະໜາທັມ ເພື່ອຄວາມເປັນສີຣີມຸງຄຸນ ຄວາມຢູ່ເຢັນເປັນສຸກໃນຊີວິດ.
ການ​ຫຼີ້ນບຸນປີ​ໃຫມ່​ໃຫ້​ໄດ້​ປະ​ໂຫຍ​ດ ​ໃຫ້​ໄດ້​ສາລະ​ຂອງ​ປີ​ໃຫມ່​ກໍ່​ຄື ຄວາມ​ບໍ່​ປະໝາດ​ໃນ​ຊີວິດ ຖ້າ​ເຮົາ​ປະໝາດ​ແລ້ວ​ເທົ່າ​ກັບ​ວ່າ​ເຮົາ​ຕາຍ​ແລ້ວ ສະ​ນັ້ນ​ຢ່າ​ປະໝາດ ​ເຮົາ​ຈະ​ເຫັນ​ໄດ້​ວ່າ​ປີ​ໃໝ່ ມີ​ສາມ​ມື້ ຄື ມື້​ລ່ອງ ຄື​ມື້​ສີ້​ນປີ ໝົດ​ປີ ​ເຮົາ​ມາກ​ວດຄືນ​ວ່າ​ໃນ​ຮອບ​ໜຶ່ງ​ປີຜ່ານມາ​ເຮົາ​ເຮັດ​ຫຍັງ​ແດ່ ທີ່​ມັນ​ຜິດພາດ ​ເຮົາ​ກໍ່​ແກ້​ໄຂ ທີ່​ມັນ​ດີ​ເຮົາ​ກໍ່​ສືບ​ຕໍ່ ອັນ​ບໍ່​ດີ​ກໍ່​ປ່ອຍ​ໄປ​ນຳ​ປີ​ເກົ່າ, ມື້​ເນົາ ​ແປ​ວ່າ​ຢູ່ ​ເຮົາ​ມີ​ເວລາ​ຢູ່​ກັບ​ຕົນ​ເອັງ ຄອບຄົວ ​ເຮັດ​ກິດຈະກຳ​ຄອບ​ຄົນ​ນຳ​ກັນ, ມື້ສັງຂານ​ຂື້ນ ​ເຮົາ​ມາ​ຫາ​ສິ່ງ​ດີ ໆ ​ໃສ່​ກັບ​ຕົນ​ກັບ​ຕົວ ຕັ້ງ​ຕົ້ນ​ໃຫມ່ ທຳ​ສິ່ງ​ທີ່​ດີ​ໃໝ່​ໃຫ້​ກັບ​ຊີວິດ ນອກຈາກ​ນີ້​ຍັງ​ມີ​ຄະຕິ​ທັມ​ໃນ​ນິທານ​ສົງການ​ໃຫ້​ເຮົາ​ຄິດ ​ແລະ​ປະຕິບັດ​ໃນ​ຊີວິດ​ອີກ​ເຊັ່ນ:​
ຣາສີ​ສາມຣາສີ​ໄດ້ແກ່​ໄວ​ຂອງ​ຄົນ​ເຮົາ ປະຖົມມະ​ໄວ ​ໄວ​ຕົ້ນ​ຄົນ​ເຮົາ​ຄວນ​ເຊາະ​ສະ​ແຫວ​ງຫາ​ຄວາມ​ຮູ້​ໃສ່​ຕົນ​ເອັງ ຢ່າ​ໃຫ້​ເສຍໜ້າ ຮຽນ​ສູງ ໆ ​ເອົາ​ໄວ້​ໃຫ້​ມີໜ້າ​ຕາ​ໃນ​ສັງຄົມ ຈິ່ງ​ວ່າ​ລ້າງ​ໜ້າ, ມັດຊິມະ​ໄວ ​ໄວ​ກາງຄົນ ​ເຮົາ​ຄວນ​ຄິດ​ພິຈາລະນາ ຫາ​ວິຊາ​ອາຊີບ ຕັ້ງ​ຕົນ​ຕັ້ງ​ໂຕ​ໃຫ້​ໄດ້ ​ເຮັດ​ດ້ວຍ​ຄວາມ​ຄິດ​ໄຕ່ຕອງ​ຫາ​ເຫດຜົນ ​ເພື່ອ​ຄວາມ​ໝັ້ນຄົງ ຈິ່ງ​ວ່າ​ລ້າງ​ເອິກ, ປັດ​ສິມ​ມະ​ໄວ ​ໄວ​ສຸດ​ທ້າຍ ຄົນ​ເຮົາ​ເມື່ອ​ເຖົ້າ​ແກ່​ສະຣາການ​ມາ​ແລ້ວ​ເຮົາ​ຈະ​ຍ່າງ​ໄປ​ທາງ​ໃດ ຈະ​ຍ່າງ​ເຂົ້າ​ຫາ​ສິນ​ຫາ​ທັມ ຫຼື​ຍ່າງ​ເຂົ້າ​ຫາ​ອະບາຍ​ຍະ​ມຸກ​ຕ່າງ ໆ ​ເພິ່ນ​ຈິ່ງ​ວ່າ​ໃຫ້​ລ້າງ​ຕີນ ​ໃຫ້​ເປັນ​ແບບຢ່າງ​ອັນ​ດີ​ໃຫ້​ລູກ​ໃຫ້​ຫຼານ ຍ່າງ​ເຂົ້າ​ວັດ​ເຂົ້າ​ວາ ຫາ​ຄວາມ​ສະຫງົບ​ແຫ່ງ​ຈິດ​ແຫ່ງ​ໃຈ​ໃສ່​ຕົນ​ເອັງ...
ທັມມະ​ບານ ​ແປ​ວ່າ​ທັມ​ຄຸ້ມ​ຄອງ​ໂລກ ສອງ​ຢ່າງ ຫິຣິ ຄວາມ​ລະອາຍ​ແກ່​ໃຈ ​ເຮົາ​ມີ​ຄວາມ​ອາຍ​ໃນ​ໃຈຢູ່​ແລ້ວ​ຈະ​ບໍ່​ເຮັດ​ຊົ່ວ ​ເຮັດ​ບາບ ​ເຖິງ​ວ່າ​ມີ​ຄົນ​ເຫັນ ຫຼື ບໍ່​ເຫັນ​ກໍ່ຕາມ ​ເພາະ​ເຮົາ​ອາຍ​ແກ່​ໃຈ​ຢູ່, ​ໂອ​ຕຕັບ​ປະ ຄວາມ​ຢ້ານ​ກວາ ຕໍ່​ຜົນ​ຂອງ​ຄວາມ​ຊົ່ວ ຜົນ​ຂອງ​ບາບກຳ​ທີ່​ເຮົາ​ເຮັດ ຖ້າ​ເຮົາ​ມີ​ຄວາມ​ຢ້ານ​ຢູ່​​ໃນ​ໃຈ ກໍ່​ຈະ​ບໍ່​ເຮັດ​ຊົ່ວ ບໍ່​ເຮັດ​ບາບ.
ພົມມະ​ວິຫາຣທັມ ມີ 4 ຂໍ້ ຖ້າ​ບ່ອນ​ໃດ​ຂາດ​ພົມວິຫາຣທັມ​ແລ້ວ​ແມ່ນ​ນ້ຳ​ມະຫາ​ສະໝຸດ​ກໍ່​ເຫືອດ​ແຫ້ງ​ໄດ້ ມີ​ຄື : ​ເມ​ຕຕາ ຄວາມ​ຮັກ, ກະຣຸນາ ຄວາມ​ສົງສານ ​ເຫັນ​ອົກ​ເຫັນ​ໃຈ ບໍ່​ແລ້ງ​ນ້ຳ​ໃຈ, ມຸທິຕາ ຄວາມ​ຍິນ​ດີ ຊື່ນ​ຊົມ​ເມື່ອ​ຄົນ​ອື່ນ​ໄດ້​ດີ ບໍ່​ອິດສາ​ບັງ​ບຽດ, ອຸ​ເປກຂາ ຄວາມ​ວາງ​ເສີຍ ບໍ່​ກ້າວ​ກ່າຍ​ໜ້າ​ທີ່ ປ່ອຍ​ໃຫ້​ເປັນ​ໜ້າ​ທີ່​ຂອງ​ໃຜລາວ ຖ້າ​ທຸກ​ຄົນ​ມີ​ທັມ ສີ່​ຂໍ້​ນີ້​ແລ້ວ​ລ້ວນ​ເປັນ​ພົມ​ໄດ້​ທັງ​ນັ້ນ.
ທັມມະອີກຂໍ້ ໜຶ່ງທີ່ສຳຄັນຄື : ຄວາມກະຕັນຍູ ມີພຸດທະພາສິດວ່າ: ນິມິດຕັງສາທຸ ຣູປານັງ ກະຕັນຍູກະຕະເວທີ ແປວ່າ ຄວາມກະຕັນຍູເປັນເຄື່ອງໝາຍຂອງຄົນດີ ດັ່ງນັ້ນ ໃນໂອກາດປີໃຫມ່ນີ້ ເປັນໂອກາດດີທີ່ເຮົາຈະໄດ້ສະແດງຄວາມກະຕັນຍູຮູ້ບຸນຄຸນ ຕໍ່ຜູ້ມີພະຄຸນ ຕໍ່ສິ່ງທີ່ເຮົາເຄົາລົບ ບູຊາ ຕໍ່ຜູ້ນຳປະເທດທີ່ມີຄຸນນະທັມ ເຮົາມາທຳໜ້າທີ່ຂອງລູກ ດ້ວຍການຮູ້ຈັກບຸນຄຸນພໍ່ແມ່ ເປັນໂອກາດດີທີ່ຫຼາຍຄົນໄດ້ກັບບ້ານ ໄດ້ຊື້ ສີ້ນ ຊື້ເສື້ອໃໝ່ ໄດ້ເອົາຂອງທີ່ພໍ່ແມ່ມັກໄປມອບໃຫ້ເພິ່ນ ຖ້າພໍ່ ແມ່ບໍ່ຢູ່ນຳເຮົາແລ້ວ ກໍ່ທຳບຸນອຸດທິດຫາ ນອກຈາກນີ້ກໍ່ທຳ ກິຍາບູຊາຜູ້ມີພະຄຸນ ດ້ວຍການສະເກົ້າ ດຳຫົວ ຕັກນ້ຳໃຫ້ທ່ານອາບ ລ້າງຕີນລ້າງມືໃຫ້ເພິ່ນ ສົມມາຄາລະວະ ພໍ່ແມ່ກໍ່ອວຍໄຊໃຫ້ພອນ ເປັນສິ່ງທີດີ ຕໍ່ກັບຊີວິດເຮົາ



Comments

Popular posts from this blog

ຄວາມເປັນມາຂອງວັນບຸນອອກພັນສາ

ວັນມາຄະບູຊາ

ບຸນເຂົ້າພັນສາ